SHIRIKA LA TCRS KWA UFADHILI WA NCA YAFUNGWA WILAYA YA KISHAPU WASHIRIKI WAKUMBUSHWA KUENDELEZA UJUZI

Na Mapuli Kitina Misalaba

Shirika la Tanganyika Christian Refugee Service (TCRS) kwa ufadhili wa kifedha kutoka shirika la Norwegian Church Aid (NCA); limeendesha mafunzo yakuongeza thamani kwenye mazao hasa Nyanya, kwa wakulima pamoja na wadau wengine wa kilimo kutoka kata za Sekebugolo na Mondo Halmashauri ya Wilaya ya Kishapu Mkoani Shinyanga.

Mafunzo hayo yamefanyika kwa siku tatu katika ukumbi wa mikutano kijiji cha Mwigumbi Wilaya ya Kishapu na kwamba yameandaliwa na shirika la TCRS huku wawezeshaji wakitoka shirika la kuhudumia viwanda vidogo SIDO Mkoa wa Shinyanga.

Wakulima 20 walioshiriki mafunzo hayo wamepewa vyeti wakiwemo wafanyabiashara wa zao la Nyanya kutoka kwenye vijiji vinne ambavyo ni Mipa, Dulisi, Weshiteleja pamoja na kijiji cha Sekeididi na kwamba wamepewa mafunzo mbalimbali ikiwemo usindikaji wa zao la nyanya ili kupata Tomato Sauce and Tomato Paste.

Akizungumza kwenye mafunzo hayo afisa uendeshaji Biashara kutoka shirika la kuhudumia viwanda vidogo SIDO Mkoa wa Shinyanga Joseph Taban amewasisitiza washiriki baada ya kupata elimu hiyo, kujiendeleza zaidi na ujuzi huo ili waweze kunufaika wao na jamii kwa ujumla.

“Baada ya mafunzo haya na leo hii tumetunukiwa vyeti yasiishie hapa hapa ni lazima tuhakikishe kwamba ujuzi huu tulioupata ukawe na manufaa kwetu na watu wengine wanaotuzunguka, hapa umepata ujuzi lakini ili uweze kuwa na manufaa, ujuzi huu ni wewe kuendelea kufanyia mazoezi hata kabla hujaanza kuanzisha hicho kiwanda kidogo cha usindikaji anza kusindika kwa ajili ya matumizi ya Nyumbani kwanza halafu badaye utakavyokuwa unafanya mara kwa mara utakuwa unagundua na vitu vingine ambavyo hukujifunza awali”.amesema Taban

Kwa upande wake afisa uendeshaji Biashara mwandamizi kutoka SIDO Bwana Abel Bebwa amewasihi washiriki hao kujiamini zaidi kwenye utekelezaji wa majukumu yao ikiwemo kuchangamkia fursa zinazojitokeza katika Maisha ya kila siku.

Naye afisa Kilimo kutoka shirika la TCRS Wilaya ya Shinyanga Bwana Laurent Stanslaus amezungumzia umuhimu wa mafunzo hayo hasa kwa wakulima na wafanyabiashara wa zao la Nyanya.

“Mafunzo haya yanalenga hasa kuweza kupunguza matatizo ambayo yanatokana na uharibifu wa chakula kwa sababu kuna muda wakulima wanavuna mazao mengi hasa mazao yanayowahi kuharibika mfano zao la Nyanya akivuna halafu unakuta soko ni changamoto kwahiyo tumeona kwamba tuwape mafunzo haya ili mkulima aweze kuwa na uwezo wa kufaidika na mazao anayoyapata”.amesema Stanslaus

Washiriki wa mafunzo hayo wameshukuru TCRS, NCA pamoja na shirika la SIDO kwa kuwapa elimu hiyo ambayo wamesema itawasaidia kuinuka kiuchumi hasa katika Biashara pamoja na shughuli zingine za kwenye familia zao ikiwemo kusomesha watoto.

Afisa uendeshaji Biashara mwandamizi kutoka shirika la kuhudumia viwanda vidogo SIDO Bwana Abel Bebwa akitoa maelekezo kwa washiriki wa mafunzo hayo kuhusu mambo muhimu ya kuzingatia katika usindikaji wa sosi ya Nyanya.

Washiriki wakiwa katika maandalizi ya kuanza zoezi la usindikaji wa sosi ya Nyanya.

Washiriki wakiandaa mahitaji muhimu ikiwemo vitunguu maji, Chumvi, Sukari, Pilipili manga kwa ajili ya usindikaji wa sosi ya Nyanya.

Washiriki wakiandaa mahitaji muhimu ikiwemo Nyanya, vitunguu maji, Chumvi, Sukari, Pilipili manga kwa ajili ya usindikaji wa sosi ya Nyanya.

Zoezi la kusaga Nyanya likiendelea.

Mafunzo yakiendelea.

Afisa uendeshaji Biashara mwandamizi kutoka shirika la kuhudumia viwanda vidogo SIDO Bwana Abel Bebwa (kulia) akikabidhi cheti kwa mshiriki ambaye amehitimu mafunzo ya usindikaji vyakula (Tomato Sauce and Paste) yaliyoandaliwa na shirika la TCRS Wilaya ya Kishapu Mkoani Shinyanga.

Zoezi la kukabidhi vyeti kwa washiriki kwa ajili ya mafunzo ya usindikaji vyakula (Tomato Sauce and Paste) yaliyoandaliwa na shirika la TCRS Wilaya ya Kishapu Mkoani Shinyanga likiendelea.

Afisa uendeshaji Biashara kutoka shirika la kuhudumia viwanda vidogo SIDO Mkoa wa Shinyanga Bwana Joseph Taban akiwasisitiza washiriki kuendeleza ujuzi walioupata kwenye mafunzo hayo.

Afisa uendeshaji Biashara mwandamizi kutoka shirika la kuhudumia viwanda vidogo SIDO Bwana Abel Bebwa akizungumza kwenye mafunzo hayo.

Afisa Kilimo kutoka shirika la TCRS Wilaya ya Shinyanga Bwana Laurent Stanslaus akizungumzia umuhimu wa mafunzo hayo kwa wakulima na wafanyabiashara hasa wa zao la Nyanya.