Na Mapuli Misalaba,SHINYANGA
Shirika la Oxfam kwa kushirikiana na kamati ya maafa wamefanya kikao kujadili namna bora ya kukabiliana na majanga mbalimbali yanayosababisha maafa.
Kikao hicho kilichoratibiwa na shirika la Oxfam kimehusisha baadhi ya asasi za kiraia ikiwemo shirika la Redeso, Rudi, viongozi wa serikali ngazi ya mkoa na wilaya pamoja na maafisa watendaji wa kata na vijiji
Mratibu wa miradi ya shirika la oxfam kanda ya mwanza Velentine Shipuya ametaja lengo la kikao hicho kuwa ni kuangalia namna bora ya uratibu wa shughuli za kupunguza athari za maafa pamoja na ukatili wa kijinsia.
“Kwa ujumla leo tumekutana hapa na wadau kwa ajili ya kuangalia namna bora zaidi ya kufanya huu uratibu wa shughuli za kupunguza athari za maafa kama tunavyofahamu mradi huu unaelekea mwisho tunategemea kukamilisha mwaka huu mwezi wa 12 sasa tunavyoumaliza huu mradi hao wadau wengine wanauendelezaje ndio maana tuko hapa kwenye kikao ambacho kinahusisha wadau wote wa kamati ya maafa ngazi ya kata, wilaya na ngazi za Mkoa kwa ujumla wake”amesema Shipuya
“Tunapoende kuishia mwezi wa 12 basi serikali ichukue yale matokeo mazuri ambayo yameonekana kutokana na huu mradi serikali iyaendeleze itakuwa jambo la heri kabisa itaweza kuwafikia wengi zaidi maana sisi hatujawafikia wananchi wote tumefika baadhi ya vijiji lakini bado kuna vijiji vinauhitaji”amesema Shipuya.
Akifungua kikao hicho kwa niaba ya katibu wa mkoa wa Shinyanga, katibu tawala msaidizi uchumi na uzalishaji Mkoa wa Shinyanga Beda Chamatata amesema ni vyema kamati ya maafa kujiweka tayari kila wakati ili kukabiliana na maafa pale yanapojitokeza.
“Kama tunavyofahamu maafa siyo kitu ambacho kinatokea mara kwa mara mara vyingi kinatokea ghafla sasa tunaposhirikishana ngazi ya kata, wilaya na Mkoa tunapaswa majukumu yetu tuyatekeleze kwa ufasaha zaidi wakati yanapotokea majanga kama hatujapangana vizuri tunaweza tukakwama kwahiyo ni muhimu tupange kwamba tutumie njia ipi ya kuwasiliana ili iwe rahisi kufika kwenye tukio kabla uharibifu mkubwa haujatokea”amesema chamatata
Kwa upande wake mratibu wa miradi ya shirika la Redeso linaloshugulika na mradi wa kupunguza athari za maafa Halmashauri ya wilaya ya Kishapu Charles Boraga amesema wilaya hiyo inakabiliwa na changamoto mbalimbali ikiwemo mafuriko na ukame pamoja na ukatili wa kijinsia na mimba za utotoni
“Changamoto iliyopo kwa upande wa Kishapu eneo la ukanda wa utilima kijiji ukoma mwamala wao wanachangamoto ya ukame lakini baada ya muda wanakuwa na changamoto ya mafuriko lakini pia kuna ukatili wa kijinsia pamoja na mimba za utotoni bado ni changamoto”
Naye kaimu Mkurugenzi wa Halmashauri ya wilaya ya Kishapu Sigsbert Rwezaka amelipongeza shirika la Redeso kwa kuwapatia elimu na mafunzo ya kuepuka ukatili pamoja na majanga mbalimbali yaliyokuwa yakitokea kwa wananchi wa Halmashauri ya wilaya ya Kishapu .
